O‘zjan Deniz 1972 yilning 19 mayida Turkiyaning Anqara shahrida tavllud topgan. Oilada ikkinchi farzand. O‘zjan 5 yoshga to‘lgach, oilasi Aydin shahriga ko‘chib o‘tadi. Ma'lumotlarga qaraganda, bo‘lajak aktyorning oilasi juda nochor moddiy ahvolda bo‘lgan, shu sababdan O‘zjan 14 yoshidan qo‘shiq kuylab, pul topishga harakat qilgan.
1989 yilda u Germaniyaga ketadi, u yerda uning xonandalik iqtidori yuzaga chiqadi. Ba'zi manbalarda keltirilishicha, u 1992 yilda o‘zining ilk albomini taqdim etadi. Uning hissiyotlarga boy lirik taronalari qisqa fursatda ommalashib, muxlislari soni orta boshlaydi. Muxlislar muhabbatidan ilhomlangan xonanda yanada katta ishtiyoq bilan yangi qo‘shiqlar yaratishga tushadi. O‘zjan Deniz nafaqat Turkiyada, balki chet ellarda ham muvaffaqiyat bilan konsertlar beradi. Uning 1993 yilda taqdim etgan «Farishtam» nomli albomi unga katta shon-shuhrat olib keladi. Teleekranlarda tez-tez ko‘rina boshlaydi. 1994 yilda kino ijodkorlar nazariga tushadi va «Unga sevishimni ayt» nomli filmda ilk bor aktyor sifatida o‘zini sinab ko‘radi.
O‘zbek tomoshabinlari uni 2002 yilda ekran yuzini ko‘rgan «Ishkomli uy» seriali orqali taniy boshlaydilar. 2017 yilda efirga uzatila boshlagan «Istanbullik kelin» serialidagi bosh qahramon – Faruk Boran obrazi uni yurtimizda yanada mashhur qiladi.
Aktyorning shaxsiy hayoti haqida gapiradigan bo‘lsak, u 1992 yildan 2002 yilga qadar Xandan Deniz bilan nikohda bo‘lgan degan ma'lumotlar bor. 2002 yildan 2018 yilgacha turli aktrisalar bilan ishqiy munosabatlari haqida gap-so‘zlar yuradi. 2018 yilning 8 martida u o‘zidan 20 yosh kichik Feyza Aktan ismli sevgilisi bilan turmush quradi. Shu yilning 29 aprelida esa ilk marotaba ota bo‘ladi. Rafiqasi Feyza Kuzey ismli o‘g‘il farzandni dunyoga keltiradi.