Главная » 2020 » Mart » 13 » Shavkat Mirziyoyev Urganchda quriladigan Jaloliddin Manguberdi memorial bog‘i loyihasi bilan tanishdi

---

20:22 Shavkat Mirziyoyev Urganchda quriladigan Jaloliddin Manguberdi memorial bog‘i loyihasi bilan tanishdi

O‘zbekiston Prezidenti Shavkat Mirziyoyev Xorazm viloyatiga 2018-yilda amalga oshirgan tashrifi chog‘ida Urganch shahrida Jaloliddin Manguberdi memorial bog‘i tashkil etish bo‘yicha ko‘rsatma bergan edi. Shunga muvofiq loyiha taklifi tayyorlanib, bu galgi tashrif chog‘ida namoyish qilindi. Bu haqda Prezident matbuot xizmati xabar berdi. Davlat rahbari haykalning xomaki nusxasini, uning atrofdan ko‘rinishini sinchiklab ko‘rdi. Mazkur yodgorlik mahobatli bo‘lishi, uzoqdan ham yaqqol ko‘zga tashlanib turishi zarurligini ta’kidladi. Bog‘ uchun mo‘ljallanayotgan maydon mutasaddilar bilan muhokama qilindi. "Jaloliddin Manguberdi — buyuk sarkarda bobomiz, millatimizning faxr-u g‘ururi. Unga bag‘ishlangan maydon shunga yarasha katta, mazmunli bo‘lishi kerak. Bog‘ bo‘ylab Manguberdining ozodlik uchun kurashi, janglari haqida lavhlar o‘rnatilishi zarur. Bu yerga kelgan odam faqat haykalni ko‘rmay, o‘ziga bilim, kuch-qudrat olsin, turistlar tariximizni o‘rgansin”, — dedi Shavkat Mirziyoyev. Loyihani qaytadan puxta ishlab chiqish, transport harakati uchun qulayliklarni inobatga olish bo‘yicha ko‘rsatmalar berildi. Shavkat Mirziyoyev Xorazm viloyatiga safari davomida "Hazorasp” erkin iqtisodiy zonasidagi Develop Textile korxonasida, Yangiariq tumanidagi yiliga 5 million dollar daromad keltiradigan issiqxonada bo‘ldi, Ichan-qal’aga tashrif buyurib, Amir To‘ra madrasasining restavratsiyasi bilan tanishdi, Xivadagi Prezident maktabi o‘quvchilari bilan muloqot qildi. Prezident tashrif davomida viloyat faollari bilan yig‘ilish o‘tkazdi hamda Xorazmda 58 ming oila kambag‘allik bo‘sag‘asida kun kechirayotganini ma’lum qildi. Yig‘ilish davomida Shavkat Mirziyoyev avtomobillar narxi oshirilganini tanqid qildi. Xorazmda Damas va Labo’ning lokalizatsiyasi oshirilishi ma’lum qilindi. Davlat rahbarining Xorazm viloyatiga safari yakunlandi.

1 2 3 4 5 Категория: Har-Hil | Просмотров:589 | Добавил: moderator | Теги: yangilik | Рейтинг: 0.0/0

Всего комментариев: 0