Главная » 2020 » Iyun » 30 » O‘zbekistonda prokurorlar o‘z tashabbusi bilan ayblovdan voz kechadigan tartib joriy etiladi

---

21:28 O‘zbekistonda prokurorlar o‘z tashabbusi bilan ayblovdan voz kechadigan tartib joriy etiladi

O‘zbekiston Respublikasi Prezidenti Shavkat Mirziyoyev sudlarda prokurorlar o‘z tashabbusi bilan ayblovdan voz kechadigan tartibni joriy etish taklifini bildirdi. Davlat rahbari bu haqda bugun, 30 iyun kuni odil sudlovni ta’minlash va korrupsiyaga qarshi kurashish borasidagi vazifalar muhokamasiga bag‘ishlangan videoselektor yig‘ilishida gapirgan. Prezidentning qayd etishicha,  2018-2019 yillarda birinchi instansiya sudlarida jami 192 ta jinoyat ishi bo‘yicha 307 nafar shaxs oqlangan bo‘lsa-da, lekin hech qaysi holatda prokuror ayblovdan voz kechmagan. "Bundan buyon tergov jarayonidagi xatolar sud majlisida aniqlansa, prokuror sudning tugashini kutib o‘tirmasdan (2 oydan 6 oygacha), o‘z tashabbusi bilan ayblovdan voz kechadigan tartib joriy etilishi lozim”, deydi Shavkat Mirziyoyev. Eslatib o‘tamiz, Prezident Mirziyoyev 2019 yilning 7 dekabr kuni O‘zbekiston Respublikasi Konstitutsiyasi qabul qilinganining 27 yilligi munosabati bilan o‘tkazilgan tantanali marosimda huquqni muhofaza qiluvchi organlarni faqat va faqat xalq manfaati yo‘lida og‘ishmay xizmat qiladigan idoralarga aylantirish zarurligini ta’kidlagandi. Sudlarning mustaqilligini mustahkamlash, tergov-surishtiruv jarayonida o‘zaro tiyib turish tamoyillarini ta’minlash, advokatura institutini takomillashtirishga oid dolzarb vazifalarni ko‘rsatib o‘tdi. O‘shanda davlat rahbari O‘zbekistonda 2020 yildan boshlab prokuror qarori ustidan sudga murojaat qilish tartibi joriy etilishi haqida gapirgandi.  "Shu orqali surishtiruv va dastlabki tergov jarayonida muvozanatni, ya’ni o‘zaro tiyib turish tamoyillarini ta’minlash imkoni yaratiladi. Bunday  muhim o‘zgarish ham bizning tajribamizda birinchi marta joriy etilmoqda. Sir emas, ilgari prokuratura idoralari nihoyatda yopiq, nazoratdan xoli bir organga, ta’bir joiz bo‘lsa, oxirgi instansiyaga aylanib qolgan edi. Buning oqibatida qancha-qancha odamlar nohaq jabr chekkani, adolatsizlikka duchor bo‘lgani ham ayni haqiqat. Qanchalik og‘ir va noxush bo‘lmasin, biz shu haqiqatni tan olib, bu sohada qonuniylik va adolatni qaror toptirishga kirishdik. Ishonamanki, prokuror qarori ustidan sudga murojaat qilish bo‘yicha rivojlangan demokratik mamlakatlarda amal qiladigan bunday tajribani joriy etish hayotimizda adolat mezonini mustahkamlashda ulkan qadam bo‘ladi", degan edi Prezident.

1 2 3 4 5 Категория: Har-Hil | Просмотров:469 | Добавил: moderator | Теги: yangilik | Рейтинг: 0.0/0

Всего комментариев: 0