O‘zbekistonda xizmat ko‘rsatgan artist Mavluda Asalxo‘jayeva shu kunlarda ijtimoiy tarmoqlarda tengqurlariga qaraganda ancha faol. Xonanda kuni kecha Instagram’dagi shaxsiy sahifasi orqali to‘g‘ridan-to‘g‘ri efir muloqotiga chiqib, muxlislarining savollariga javob berdi.
Mavluda Asalxo‘jayevaga ko‘plab savollar yosh xonandalarning bachkana va tuturuqsiz qo‘shiqlari haqida bo‘ldi. Savol yo‘llovchilardan biri O‘zbekistonda xizmat ko‘rsatgan artist Gulbahor Erqulovaning yosh xonandalarga qaratilgan tanqidlari haqida Asalxo‘jayevaning fikri bilan qiziqdi.
"Gulbahor gapirmasa, kim gapiradi... Gulbahor Erqulova o‘zbek san'atida o‘z o‘rniga, mavqyeiga ega, professional xonanda. U juda katta maktab ko‘rgan va bugun ustozlardan qolgan o‘sha maktabni munosib davom ettirib kelyapti.
Uning yoshlarni tanqid qilishiga kelsak, gaplarida jon bor. Men ham Gulbahorning tanqidlariga qo‘shilaman. Faqat kimdir buni ommaviy ravishda aytadi, kimdir esa indamay ketaveradi. To‘g‘ri-da, biz yosh bo‘lgan paytlarimiz ustozlarimizdan, bizdan avval san'atga kirib kelgan san'atkorlardan qo‘rqib turardik, maslahatlariga quloq solardik, tanqidlaridan to‘g‘ri xulosa chiqarardik. Bugun bundaylar barmoq bilan sanarli.
Yaxshi ovozli qo‘shiqchilar ko‘p, ammo yashab qolayotgan qo‘shig‘i yo‘q. Ko‘plarining ovozida dardi sezilmaydi, qo‘shiqqa yuragini bermaydi. Gulbahor ham tanqidlarida shularni nazarda tutganiga aminman. Har holda biz kattalar yoshlarni yomon ko‘rib tanqid qilmaymiz”, deydi Mavluda Asalxo‘jayeva.
Avvalroq, O‘zbekistonda xizmat ko‘rsatgan artist Gulbahor Erqulovaning O‘zbekiston xalq artistlari Ozodbek Nazarbekov, Gulsanam Mamazoitova, O‘zbekistonda xizmat ko‘rsatgan artist Ulug‘bek Rahmatullayevga qaratilgan tanqidlari katta shov-shuvlarga sabab o‘lgan edi.