Avvalroq, AQSHning amaldagi prezidenti Barak Obama 10 yanvar kuni Chikagoda xayrlashuv nutqi bilan chiqish qilishi haqida xabar bergan edik.
10 yanvar kuni Chikagoda AQSH prezidenti Barak Obama prezidentlikdagi so‘nggi nutqi bilan chiqish qildi. Aynan shu shaharda Barak Obama ikki karra, ya'ni 2008 va 2012 yillarda qo‘shma shtatlar prezidentligi lavozimini egallagandi. Barak Obama o‘z nutqi davomida so‘nggi 8 yil davomida AQSH barcha yo‘nalishlar bo‘yicha yuqori ko‘rsatkichlarga erishganini ta'kidladi. Bu haqda "Time” nashri xabar tarqatdi.
Barak Obama sog‘liqni saqlash sohasida, bo‘sh ish o‘rinlari borasida, iqtisod sohasida yuksalish qayd etilganini aytib o‘tdi.
Prezident nutqi davomida turmush o‘rtog‘i Mishel Obama bilan birgalikda Amerikaning ko‘plab aholisidan minnatdorchilik bitilgan maktublar olganini ma'lum qildi.
"So‘nggi bir necha hafta davomida sizlardan iliq tilaklar bitilgan xatlarni oldik va biz bundan mamnunmiz. Hozir esa men sizlarga rahmat aytmoqchiman. Siz bilan mening qarashlarim ba'zan to‘g‘ri kelmagan vaziyatlar ham bo‘lgan, ammo men har kuni sizlardan yangilik o‘rgandim. Sizlar meni eng yaxshi prezidentga va yaxshi odamga aylantirdingiz. O‘zgarishlar yanada yuksalishlarga olib kelishiga umid qilaman”, dedi Obama.
Barak Obama so‘nggi vaqtlarda mamlakatda yashovchi aholining daromadlari oshayotganligini, kambag‘allik darajasi esa pasayayotganligini e'tirof etdi. Uning so‘zlariga ko‘ra, badavlat kishilar o‘z daromadlaridan adolatli ravishda soliq to‘lashyapti. Amerikalik bir qator ekspertlar ham iqtisodiyotning bir necha yo‘nalishlari rivojlanishida Barak Obamaning infratuzilmaga invetitsiya kiritish borasidagi dasturi qo‘l kelganini ta'kidlab o‘tishdi.
Barak Obama o‘z nutqining yakunida oilasiga, jumladan Mishel Obamaga minnatdorchilik bildirdi. Rafiqasi haqida so‘zlar ekan, uni "nafaqat ayolim, maslahatdoshim, do‘stim”, deya atadi. Shu so‘zlarni so‘zlayotib Barak Obamaning ko‘zlariga yosh keldi.
Shuningdek, Obama vitse-prezident Jo Baydenga ham minnatdorchiligini izhor etdi. Qarsaklar ostida yakunlangan nutqni Barak Obama "Ha, biz qila oldik. Ha, biz qildik. Ha, biz qila olamiz”, degan jumla bilan yakunladi.