Главная » 2020 » Iyul » 6 » Afg‘oniston prezidentining homiysi bo‘lgan o‘zbek biznesmeni Turkiyada koronavirusdan vafot etdi

---

14:23 Afg‘oniston prezidentining homiysi bo‘lgan o‘zbek biznesmeni Turkiyada koronavirusdan vafot etdi

Afg‘oniston prezidentining asosiy maslahatchilaridan biri va yirik biznesmen Muhammad Yusuf G‘azonfar 3-iyul kuni koronavirus sabab yuzaga kelgan pnevmoniya oqibatida vafot etdi. Bu haqda mamlakat rahbarining saytida ma’lum qilingan. G‘azonfar bir muncha vaqt o‘zini yomon his qilgan. Biznesmenning yordamchisi Fraydun Elhamning so‘zlariga ko‘ra, G‘azonfar Turkiyadagi shifoxonalarning birida vafot etgan. G‘azonfar iyun oxirlarida koronavirusga chalingan edi, uni Afg‘onistonda davolashga urinishgan, biroq bemorning ahvoli o‘g‘irlashgach Turkiyaga olib ketilgan. Asli kelib chiqishi o‘zbek bo‘lgan Muhammad G‘azonfar nafaqat Ashraf G‘anining iqtisodiy taraqqiyot, savdo va kambag‘allikni qisqartirish masalalari bo‘yicha maslahatchisi, balki uning yaqin do‘sti ham bo‘lgan. So‘nggi prezidentlik saylovlarida u Ashraf G‘ani saylovoldi kampaniyasining 90 foiz budjetini moliyalashtirgan. Afg‘onistondagi xususiy Ghazanfar bankining aksiyadori bo‘lgan biznesmen mamlakatdagi eng badavlat insonlardan biri sanalgan. "U prezident G‘anining do‘sti va uning so‘nggi saylovoldi kampaniyasining bosh homiysi, Afg‘oniston siyosatining eng nufuzli kuchli uchligidan o‘rin olgandi”, — deyiladi xabarda. Manbalarga ko‘ra, biznesmen Afg‘oniston prezidentining turli kadrlar, iqtisodiy va siyosiy qarorlariga kuchli ta’sir ko‘rsata olgan, shuningdek, mamlakatning turkiyzabon etnik guruhlari rasmiylari, xususan, o‘zbek guruhlari vakillari bilan aloqalarda uning norasmiy vakili bo‘lgan. Kobuldagi manbalarning ta’kidlashicha, G‘azonfarning Toshkentda ham "kuchli aloqalari” bo‘lgan, bu esa Afg‘onistonni qo‘llab-quvvatlovchi mintaqaviy koalitsiya tuzishga yordam bergan va boshqa etnik guruhlar vakillari orasida ham obro‘ga ega bo‘lgan. Gazonfar afg‘on o‘zbeklarining yana bir lideri, munozarali obro‘ga ega nufuzli siyosatchi, yaqinda marshal unvonini olgan Abdurashid Do‘stumning siyosiy dushmani hisoblanadi. So‘nggi ma’lumotlarga ko‘ra, Afg‘onistonda koronavirusga chalinganlar soni 32 951 kishiga yetgan. Hozirga qadar mamlakatda 864 kishi COVID-19 qurboniga aylangan.

1 2 3 4 5 Категория: Har-Hil | Просмотров:464 | Добавил: moderator | Теги: yangilik | Рейтинг: 0.0/0

Всего комментариев: 0